رخ اپنا ہم کو دکھلایا تو ہوتا

رُخ اپنا ہم کو دِکھلایا تو ہوتا

ذرا سورج کو شرمایا تو ہوتا

مِرے دل کا پتا ملتا انہیں میں

ذرا زُلفوں کو سلجھایا تو ہوتا

مجھی کو واعظا پند و نصیحت

کبھی اس کو بھی سمجھایا تو ہوتا

جو اپنا جان کر مارا، گِلہ کیا

مگر مرقد پہ تُو آیا تو ہوتا

سرِ سیخِ مژہ میں دل پِرو کر

کبابِ پُرنمک کھایا تو ہوتا

سمجھتے عشقِ پیچاں اس کو بلبل

کمر نے گُل کی بل کھایا تو ہوتا

تجھے کھُل جاتی اخترؔ سوزشِ عشق

کوئی گُل ہاتھ پر کھایا تو ہوتا

واجد علی شاہ اختر