مرے نصیب میں کب ہیں مرے خدائے سخن

مِرے نصیب میں کب ہیں مِرے خدائے سخن

وہ چند حرف جو دائم ہوں ماورائے سخن

ہے تیرے نام سے آغاز منتہائے سخن

تِری خبر جو نہیں میرے مبتدائے سخن

یہ کم نصیبی بھی کم کم نصیب ہوتی ہے

تِری تلاش میں نکلے تو ڈھونڈ لائے سخن

ہم اپنے دل کی کوئی بات ہی نہ کر پائیں

اب اس قدر بھی نہیں تنگ تنگنائے سخن

کبھی کبھی تگ و دو سے بھی لفظ ملتے نہیں

کبھی کبھی تو عطا ہوں بنے بنائے سخن

اس آرزو میں وہ خوش گفتگو کلام کرے

ترابؔ ہم نے کیے ہیں سخن برائے سخن 

عطا تراب