حسن سراپا عشق مجسم صلی اللہ علیہ و سلم

عارفانہ کلام حمد نعت منقبت سلام

ہدیۂ نعت بحضور سرورِ کائناتﷺ

حُسن سراپا، عشقِ مجسم، صلی اللہ علیہ و سلم

رُوئے منور گیسوئے پُرخم، صلی اللہ علیہ و سلم

سوز سراپا، درد مجسم، عاشقِ امت، شافعِ عالم 

آنسو تیرے، شبنم، شبنم، صلی اللہ علیہ و سلم

صاحبِ قرآں فخرِ رسولاں خسروِ دین و رحمتِ یزداں

بادۂ عرفاں، ساقیٔ عالم، صلی اللہ علیہ و سلم

سازِ ازل سے تارِ ابد تک، ایک ترنم، ایک تلاطم

بربطِ جاری، نغمۂ پیہم، صلی اللہ علیہ و سلم

شوق کا مرجع درد کا مسکن، شافعِ امت کیف کا ضامن

حسن کا منبع، عشق کا سنگم، صلی اللہ علیہ و سلم

فرش سے ہے تا عرش اجالا، ذرہ ذرہ نور کا ہالہ

ماہِ سراپا، مہرِ دو عالم، صلی اللہ علیہ و سلم

اے کہ طبیبِ عالمِ امکاں، چارہ گرِ بیماریٔ انساں

تُو نے رکھا زخموں پہ مرہم، صلی اللہ علیہ و سلم

سر میں سجودِ شوق کا طوفاں، آنکھوں میں سو ابرِ باراں

کوئے مدینہ اور یہ موسم، صلی اللہ علیہ و سلم

ساغر نظامی