کرب کی بین بجاتے ہوئے حالات کے دُکھ
مجھ سے جھیلے نہیں جاتے یہ دن و رات کے دکھ
تیری خوشیوں سے جڑی ہیں مِری خوشیاں یارا
منسلک ذات سے تیری ہیں مِری ذات کے دکھ
ہم زمیں زاد تو ہیں، پر ہیں خداؤں والے
ہم فقیروں کو ہُوا کرتے سماوات کے دکھ
عام انساں تو فقط شعر پڑھے، واہ کہے
ایک شاعر ہی سمجھ سکتا ہے جذبات کے دکھ
زندگی سے ہو اگر کوئی گِلہ، ذکر کرو
عشق کے دکھ تو ہوا کرتے خرافات کے دکھ
لب سے ہر بُوند پہ اک آہ ادا ہوتی ہے
جا کے مزدور سے پوچھو کبھی برسات کے دکھ
ساتھ تفریح کا ساماں، نہ موبائل، نہ سکھی
تم کو معلوم بھی ہیں دوست! مضافات کے دکھ
زویا بچپن کے گناہوں کی سزا یوں پائی
کھا گئے مجھ کو جوانی میں مکافات کے دکھ
زویا شیخ
No comments:
Post a Comment