میں کسی اور کی نسبت سے پکارا جاؤں
اس سے اچھا ہے تِرے نام پہ مارا جاؤں
طوق ہو تیری غلامی کا مِری گردن میں
پھر بھلے آگ سے سو بار گزارا جاؤں
میرے کاسے میں ضیا ڈال مجھے کر دے امر
شبِ ظلمت! میں بنوں شمس، اُبھارا جاؤں
زندگی اس کے سوا ساری زیاں میری ہے
میری حسرت ہے تِرے دِین پہ وارا جاؤں
تُو نہ ہوتا، تو مجھے کون بتاتا رستہ؟
چھوڑ ناں مجھ کو کہیں بھول نہ یارا جاؤں
دستِ ملت میں رہوں خنجر و تیشے کی طرح
تیرے گستاخ کے سینے میں اتارا جاؤں
تُو ہے سلطان مِرا تجھ سے مِری عزت ہے
تیرا در چھوڑ کہاں اے مِرے دارا جاؤں
میں ہوں عاجز تُو مِرا شافعِ روزِ محشر
اب کہاں اور کہیں ڈھونڈوں سہارا جاؤں
خادم علی عاجز
No comments:
Post a Comment