عدو کے وار سے مجھ کو بچا کے نوچتے ہیں
مِرے عزیز گلے سے لگا کے نوچتے ہیں
انہیں بھلاؤں تو کانٹے بھی نرم لگتے ہیں
کروں جو یاد تو ریشم بھی آ کے نوچتے ہیں
مشاہدے سے یہ جانا ہے یار! محفل میں
بٹھا کے پاس مجھے مسکرا کے نوچتے ہیں
گِرہ لگانے کا مطلب ہے ایک مصرع میں
کہ خود کو ہاتھ کے ناخن بڑھا کے نوچتے ہیں
بہت ہی تیز ہے میرے نفس کے کیڑے بھی
جو خواہشوں کو ضرورت بتا کے نوچتے ہیں
عجیب لوگ ہیں شہرِ سخن میں صابر جی
مِری غزل کو دُکانوں سے لا کے نوچتے ہیں
بلال صابر
No comments:
Post a Comment