ریگزار زمیں پہ چھوڑ دیا

 ریگ زارِ زمیں پہ چھوڑ دیا

جاں کہیں، دل کہیں پہ چھوڑ دیا

ایک چہرے کی سمت بدلی تھی

ہم نے سب کچھ وہیں پہ چھوڑ دیا

سرد ہونٹوں سے بوسہ سینچا، پھر

عارضِ آتشیں پہ چھوڑ دیا

کیا ستم ہے کہ ایک لغزش پر

آسماں سے زمیں پہ چھوڑ دیا

اس سے بڑھ کر نشانی کیا ہوتی

داغِ سجدہ جبیں پہ چھوڑ دیا

محو دیکھا تو کہنے والے نے

قصہ یک دم نہیں پہ چھوڑ دیا

دوست پرور تھا خوش گماں ارشد

سانپ پھر آستیں پہ چھوڑ دیا

زبیر ارشد