کتاب عشق کا شاید یہی قصہ پرانا ہے

 کتابِ عشق کا شاید یہی قصہ پرانا ہے

کہ ہر ممکن کسی ذی ہوش کو مجنوں بنانا ہے

مرے سانپ اور لاٹھی بھی نہ ٹوٹے کا زمانہ ہے

حقیقت بھی یہی ہے آج کل، یہ ہی فسانہ ہے

کرو موقوف سارے کام ہر تقریب سے پہلے

اعزّہ اور اقارب کو بھی تو آخر منانا ہے

سبب ناراضئ دل کا خدارا کہہ دو بالآخر

سدا کی طرح یوں ہی جی جلانا یا ستانا ہے

نہ ہو کیوں کر اسیرِ دام آخر طائرِ حُر بھی

برائے زندگی اس کو تلاش آب و دانہ ہے

ڈرائیں جب کبھی تاریکیاں راہوں میں منزل کی

ہمیشہ لے کے مشعل ہاتھ میں ان کو مٹانا ہے

جسے دیکھو رضیہ مبتلائے خود فریبی ہے

بزعمِ خود عمل ہر ایک اس کا عاقلانہ ہے

رضیہ کاظمی