حدودِ ضبط پھر اک رات آزمائی گئی
کہ پور پور اذیت کو چپ سکھائی گئی
ہمارا عکس دہکتی تپش میں جھونکا گیا
ہماری آنکھ کسی پانی میں بہائی گئی
وہ ہاتھ چھُوٹ گیا اور ریل چلنے لگی
ہمارے ہاتھ سے عمروں کی اک کمائی گئی
وہ بدحواس کہیں جنگلوں میں لوٹ گئی
تمہارے بعد محبت بہت ستائی گئی
فگار آنکھ کو نظموں کا پیرہن سونپا
جو دم اٹکنے لگا شاعری سنائی گئی
ہمارے ٹوٹے ہوئے خواب کی چنگاریوں سے
تمہاری رات میں اک روشنی بنائی گئی
سارہ تعبیر
No comments:
Post a Comment