گھٹن اداسی کا آئینہ ہے اور آئینے میں پڑی دراڑیں
ہمارا چہرہ اُبھارنے کی سعی میں خود کو تھکا رہی ہیں
خزاں کی زد میں
طویل ہجرت کا بار کاندھے جھُکا چکا ہے
وہ گیسُو جن میں تمہاری نظمیں تھی
ان میں چاندی کے تار حسرت سے جلوہ گر ہیں
وہ ہونٹ جن پر نزاکتوں کے
طویل قصوں کو فُرصتوں میں
اُتارا جاتا تھا
سُوکھی مٹی کے بھُربھُرے سے وجود کی شکل لے چکے ہیں
وہ ہاتھ جن کی شگفتگی پر تمہاری جانب سے دنیا بھر کے
سبھی گلابوں کی ساری قسموں کی بھینٹ چڑھتی تھی
بے اماں ہیں
وہ آنکھیں جن کو سبھی ستاروں پہ فوقیت تھی
کہیں پرانی حویلیوں کے اُجاڑ خانوں میں رکھے بُجھتے چراغ سی ہیں
اب ایسی صورت میں تیرا چہرہ نظر بھی آئے تو کیا کریں گے؟
ہمارے جیسے دوا کے قائل
دعا پہ کب اکتفا کریں گے؟
مقدس ملک
No comments:
Post a Comment