اس محبوب کا صدقہ میری مان ہوا

عارفانہ کلام نعتیہ کلام

اس محبوبؐ کا صدقہ میری مان ہَوا

تجھ پر نافذ ہے جس کا فرمان ہوا

طیبہ میں اک نعتؐ ہدیہ لیتی جا

کر دے مجھ پر اتنا تو احسان ہوا

کر معمور دل و جاں کو اس خوشبو سے

لا طیبہ سے کچھ عطر و لوبان ہوا

تُو جالی کے اس جانب بھی جاتی ہے

جس جانب ہے مولیٰ کی بُرہان ہوا

میرے بھی ممدوح وہی ہیں تیرے بھی

یعنی احمدﷺ ممدوح رحمٰن ہوا

تُو محظوظ ہوئی ہے ان کی سانسوں سے

رب نے تجھ کو بخشی کیسی شان ہوا

تُو بھی شامل تھی سرکارؐ کی طینت میں

تجھ پہ فدا ہو جائے میری جان ہوا

تُو نے تو سرکارؐ کے لب بھی چومے ہیں

میں تیری خوش بختی پر قربان ہوا

تُو نے حرا میں وہ منظر بھی دیکھا تھا

اترا تھا قرآن پہ جب قرآن ہوا

ساتھ رہی ہے اسرا و معراج میں تو

پائے ہیں کیا کیا روح و ریحان ہوا

تو گوش سرکارﷺ تلک پہنچاتی تھی

نعت پڑھا کرتے تھے جب حسّان ہوا

میں بھی تیرے ساتھ مدینے جا پہنچوں

ہے کوئی اس طرح کا امکان ہوا

آتی ہے شہزاد ریاض الجنت سے

تازہ تر کرنے میرا ایمان ہوا ​

شہزاد مجددی