شب تاریک زنداں میں کہیں سے روشنی آئے

 شبِ تاریکِ زنداں میں کہیں سے روشنی آئے

کبھی تو گنبدِ دل سے صدائے زندگی آئے

ابھی ہے زندگی اوہام کی تاریکیوں میں گم

چراغِ عقل روشن ہو شعاعِ آگہی آئے

رِہیں گر صوفی و ملا کی فتنہ بازیاں باقی

تو کیسے بندگی میں سوز و سازِ بندگی آئے

بشکلِ آدمی چاروں طرف خُونیں درندے ہیں

فلک سے یہ صدائیں آ رہی ہیں؛ آدمی آئے

نہ رشتوں میں تقدس ہے نہ ہے احباب میں الفت

گُلِ پژمُردہ دل سے کیسے بوئے دوستی آئے

فرشتوں پر بھی لازم ہے اٹھیں تعظیم کی خاطر

پکاریں یک زباں ہو کر جنابِ جعفری آئے

مقصود جعفری