غریبوں پر کریں احسان آقا

 عارفانہ کلام حمد نعت منقبت

غریبوں پر کریں احسان آقاﷺ

ہمارے بھی بنیں مہمان آقاﷺ

ہمارے گھر کبھی تشریف لائیں

بنے گلشن یہ ریگستان آقاﷺ

دو عالم پر ہے جس کی بادشاہی

کہاں ہے آپﷺ سا سلطان آقاﷺ

زمانے میں جہاں بھی روشنی ہے

ہے سارا آپﷺ کا فیضان آقاﷺ

وہ جس نے آپﷺ کو راضی کیا ہے

اُسی پر خوش ہوا رحمان آقاﷺ

نہیں کچھ آپﷺ  سے بڑھ کر نہیں ہے

مِری اولاد مال و جان آقاﷺ

کرم سے آپ کے میری لحد میں

کھلے جنت کا روشندان آقاﷺ

جسے کہتی ہے دنیا نعت گوئی

مِری بخشش کا ہے سامان آقاﷺ

بچا لیجے تباہی سے اب اس کو

دہانے پر ہے پاکستان آقاﷺ

ثناء کا حق ادا ہوتا نہیں ہے 

میں جتنے بھی لکھوں دیوان آقاﷺ

کرم فرمائیے تنہا پہ اب تو

حضوری کا بنے امکان آقاﷺ

محمد عمران تنہا