غبار راہ وفا آسماں سا لگتا ہے
ہر ایک ذرہ یہاں کہکشاں سا لگتا ہے
یہ فاصلہ مجھے جانے کہاں پہ لے جائے
وہ فاصلہ جو تِرے درمیاں سا لگتا ہے
مِرے بڑوں کی دعاؤں کا یہ کرشمہ ہے
کہ سر پہ مجھ کو سدا سائباں سا لگتا ہے
نئی اڑان نے یوں دور کر دیا گھر سے
کہ آسماں مجھے اپنا مکاں سا لگتا ہے
یقین جانیے ہم دل جلوں کی باتوں سے
کبھی دھواں نہیں اٹھتا دھواں سا لگتا ہے
سعید مجھ کو تو اب زندگی کا ہر لمحہ
یقیں سا ہوتے ہوئے بھی گماں سا لگتا ہے
سعید نعمانی مرادآبادی
No comments:
Post a Comment