ویران دل میں رونق کاشانہ بن کے آ
اے یاد یار جلوۂ جانانہ بن کے آ
حاصل ہوں تلخیوں میں بھی لذات اے حیات
بزم جہاں میں گردش پیمانہ بن کے آ
دونوں کی ظلمتوں کو ضرورت ہے نور کی
شمع حرم، چراغ صنم خانہ بن کے آ
شمع جمال یار فروزاں ہے بزم میں
دیدار کی ہوس ہے تو پروانہ بن کے آ
اپنوں کی قدر ہوتی نہیں اس دیار میں
ہر چند آشنا ہے پہ بے گانہ بن کے آ
جا بزم اہل حال میں دیوانگی لیے
اور بزم اہل قال میں فرزانہ بن کے آ
ہنگامۂ جہاں سے بہت تھک چکے ہیں اب
اے زندگی خموشیٔ ویرانہ بن کے آ
گر ہے متاع غم کا خریدار اے ولی
بازار درد میں زر بیعانہ بن کے آ
ولی الحق انصاری
No comments:
Post a Comment