چھوڑے ہوئے زمانہ ہوا اپنا گھر مجھے
اب تو وبالِ جاں ہے مسلسل سفر مجھے
کرتے نہیں ہیں کھل کے کبھی دل کی بات وہ
ملتے تو ہیں وہ روزِ رہگزر مجھے
ہر ایک چیز گھر کی تھی کل کس قدر عزیز
اب اجنبی سے لگتے ہیں کیوں بام و در مجھے
شاید مِرا جواب خلافِ امید ہے
حیرت سے تک رہا ہے جو نامہ بر مجھے
آخر کو درمیانِ سفر کھل گیا بھرم
سمجھا تھا راہبر نے بہت بے خبر مجھے
شاید میں اپنے دل کی طرف کر سکوں نگاہ
آرام بھی تو لینے دے دردِ جگر مجھے
صالح! یہ زہر کس نے فضا میں سمو دیا
ڈسنے لگے ہیں میرے ہی دیوار و در مجھے
صالح اچھا
No comments:
Post a Comment