عارفانہ کلام حمد نعت منقبت
دل مِرا بے بساط تھا ایک دِیا بُجھا ہوا
نعت سنی تو جل اُٹھا ایک دیا بجھا ہوا
شہرِ نبیؐ سے رخصت اور روح کا جسم میں قیام
طاق میں جیسے رہ گیا ایک دیا بجھا ہوا
آئینۂ رسولﷺ میں خود کو جو دیکھنے گیا
نور کا عکس بن گیا ایک دیا بجھا ہوا
جب یکے بعد دیگرے سارے چراغ بُجھ گئے
نام سے اُن کے جل اُٹھا ایک دیا بجھا ہوا
آپ کے دم سے دفعتآ سارے چراغ جل اُٹھے
اور کہیں نہیں رہا کوئی دیا بجھا ہوا
آپ کی کیا مثال دوں آپ تو بے مثال ہیں
اور مِری مثال کیا ایک دیا بجھا ہوا
میں نے تو دل کو بخش دی اپنی نظر کی روشنی
مجھ میں بہر نفس جلا ایک دیا بجھا ہوا
خاک میں خاک ہو کے بھی اخگر اک آگ سی رہی
جل بجھا بجھ کے جل گیا ایک دیا بجھا ہوا
حنیف اخگر
No comments:
Post a Comment