اے چارہ گر غم نہ دوا دے نہ دعا دے

 اے چارہ گر غم نہ دوا دے نہ دعا دے

جو رُوٹھ گیا ہے مجھے تُو اس سے ملا دے

اے ذوقِ طلب! تُو جو ذرا ساتھ مِرا دے

خود بھُولنے والا مجھے اُٹھ اُٹھ کے صدا دے

مانا کہ مئے ناب، مئے ناب ہے ساقی

تُو ہاتھوں سے دے اپنے تو کچھ اور مزا دے

اک میں ہی نہیں جھُوم اُٹھے سارا زمانہ

اے مطربہ! وہ نغمۂ پُر کیف سُنا دے

اے جذبۂ دل! تجھ میں اثر وہ ہو کہ خود ہی

ہر تارِ نظر منزلِ جاناں کا پتا دے

یہ زخمِ محبت نہیں وہ پھول ہے زمزم

جس حال میں ہو جیسا بھی ہو بُوئے وفا دے

صوفی محمد ایوب زمزم