گردن میں رسن پاؤں میں زنجیر پڑی ہے
کیا یہ تِرے دیوانے کی تصویر پڑی ہے
تم قاتلِ اربابِ وفا ہو نہیں سکتے
شاید یہ کسی اور کی شمشیر پڑی ہے
آسان نہیں صبر کی منزل سے گزرنا
مشکل سے مِرے نالوں میں تاثیر پڑی ہے
ہم سے بھی کِیا تھا کبھی پیمانِ محبت
اب تک وہ تِرے ہاتھ کی تحریر پڑی ہے
ویسے ہی قیامت ہے تِرا حُسنِ سراپا
پھر تا بہ کمر زُلفِ گِرہ گِیر پڑی ہے
دیوانہ کہیں رہتا ہے پابندِ سلاسل؟
وہ دیکھیے ٹُوٹی ہوئی زنجیر پڑی ہے
گزرا ہوں میں تدبیر کی ہر راہ سے رونق
ہر راہ میں دشوارئ تقدیر پڑی ہے
رونق بدایونی
No comments:
Post a Comment