آتی ہے تو آتا نہیں کچھ تیرے سوا یاد

 آتی ہے تو آتا نہیں کچھ تیرے سوا یاد

آ جائے تو ہوتی ہے تِری یاد بھی کیا یاد

ہے سلسلۂ حُسن و جمال ان کو تصور

آتے ہی چلے جاتے ہیں انداز و ادا یاد

افسانے مظالم کے وہ بھُولے نہیں جاتے

جب یادِ بُتاں آتی ہے،۔ آتا ہے خُدا یاد

ہے بے خودئ عشق مِری رسمِ عبادت

کچھ اور تو مجھ کو نہیں آدابِ دُعا یاد

آئے گئے ہو جاتے ہیں افسانے ستم کے

رہتا ہے مگر ہاں تِرا اندازِ جفا یاد

اندیشۂ فردا، نہ مجھے شکوۂ ماضی

ہو تیری عنایت تو کسی بات کی کیا یاد

اُفتاد کے انداز،۔ یہ رحمت کا تبسم

آئے گی گُنہ کو بھی مِری لغزشِ پا یاد

مُدت ہوئی بھُولے ہوئے غم کا بھی فسانہ

شاکر کبھی اپنی تھی مجھے یاد تو تھا یاد

علامہ شاکر نائطی