تیرا غم دور ہے یا نزد رگ جاں کوئی

تیرا غم دور ہے، یا نزدِ رگِ جاں کوئی

موت اور زیست میں ہو فرق نمایاں کوئی

اے جنوں! یہ تو ہے دراصل وفا کی توہین 

ہاتھ رک جائے اگر تا حدِ امکاں کوئی 

برف سمجھوں گا میں سورج کی تمازت کو، اگر 

کاش مل جائے تِرا سایۂ داماں کوئی 

پرورش پائی ہے آغوشِ جنوں میں میں نے

کیا بگاڑے گی مِرا، گردشِ دوراں کوئی

سینکڑوں اشک گرے آنکھ سے لیکن صادقؔ

اشک گوہر نہ بنا حاصلِ داماں کوئی

صادق اندوری