جس وقت نظر کوئی وہاں اور ہے آتا

جس وقت نظر کوئی وہاں اور ہے آتا

اس وقت میرے دل میں گماں اور ہے آتا

میرے دلِ نالاں کے جو نالوں سے ہو نالاں

کیا کوئی یہاں نالہ کناں اور ہے آتا

اے یاس و الم جاؤ مِرے خانۂ دل سے

مہمان کوئی اب تو یہاں اور ہے آتا

جوں جوں لبِ شیریں سے مجھے دے ہے تُو دشنام

اک مجھ کو مزا پستہ وہاں اور ہے آتا

بولے وہ ظفرؔ غیر سے سن کر مری فریاد

لو آج تو اک گرم فُغاں اور ہے آتا

 بہادر شاہ ظفر