سوزش داغ الم سے پہلے بھیجا جل گیا

سوزشِ داغِ الم سے پہلے بھیجا جل گیا

بعد اس کے دل جلا اور پھر کلیجا جل گیا

اف مِرے مضمونِ سوزِ دل میں بھی کیا آگ ہے

خط جو قاصد اس کو میں نے لکھ کے بھیجا، جل گیا

تفتہ جانوں کو تِرے دوزخ ہے گلزارِ بہشت

وہ وہاں آرام سے ہے،۔ تُو کہے جا جل گیا

اس طپیدہ دل کا دل پہلو سے تُو کیوں لے چلا

کام کا تیرے نہیں یہ اس کو دے جا جل گیا

آتشِ فرقت سے میرا خانہ آتش بار ہے

اے ظفرؔ کاغذ اٹھا کر یاں سے لے جا، جل گیا

 بہادر شاہ ظفر