بجھے بجھے سے رہے ہم کسی کو پا کے بھی

بجھے بجھے سے رہے ہم کسی کو پا کے بھی
نہ پائی روشنی ہم نے دِیے جلا کے بھی
ڈھلی ہے وقت کی رفتار میری سانسوں میں
بدل رہے ہیں میرے ساتھ رخ ہوا کے بھی
کسی کو اپنے غمِ دل کی ہو خبر کیسے
کہ ہم تو زخم چھپاتے ہیں مسکرا کے بھی
مہک اٹھا میرے آنچل سے خوشبوؤں کی طرح
وہ ایک شخص کہ رکھا جسے چھپا کے بھی
جواب کوئی فلک سے بھی اب نہیں آتا
کسی نے روک لیے راستے دعا کے بھی
مِرا سکوت بھی تھا، چیخ کی طرح بسمل
لہو لہو ہوئے جاتے ہیں لب صدا کے بھی

بسمل صابری