اے دوست مٹ گیا ہوں فنا ہو گیا ہوں میں ​

اے دوست مِٹ گیا ہوں فنا ہو گیا ہوں میں ​

اس دردِ دوستی کی دوا ہو گیا ہوں میں ​

قائم کِیا ہے میں نے عدم کے وجود کو ​

دنیا سمجھ رہی ہے فنا ہو گیا ہوں میں ​

ہنسنے کا اعتبار، نہ رونے کا اعتبار​

کیا زندگی ہے جس پہ فدا ہو گیا ہوں میں ​

ہمت بلند تھی مگر، افتاد دیکھنا

چپ چاپ آج محوِ دعا ہو گیا ہوں میں​

نا آشنا ہیں رتبۂ دیوانگی سے دوست ​

کمبخت جانتے نہیں، کیا ہو گیا ہوں میں​

یہ زندگی فریبِ مسلسل نہ ہو کہیں​

شاید اسیرِ دامِ بلا ہو گیا ہوں میں ​

اٹھا ہوں اک جہانِ خموشی لیے ہوئے

ٹوٹے ہوئے دلوں کی صدا ہو گیا ہوں میں ​

ہاں کیفِ بیخودی کی وہ ساعت بھی یاد ہے

محسوس کر رہا تھا، خدا ہو گیا ہوں میں 

​

حفیظ جالندھری