جیسا بھی دل بجھا رہا جتنی بھی جاں جلی رہی

جیسا بھی دل بجھا رہا، جتنی بھی جاں جلی رہی 

لہجے میں بانکپن رہا، چہرے پہ تازگی رہی

عشق، غلام کی طرح، حسن کے روبرو رہا 

عقل کنیز کی طرح عشق کے گھر پڑی رہی

کتنے جگر چبا گئی، کتنے وجود کھا گئی 

پھر بھی حیات فاحشہ، کیسے بنی ٹھنی رہی

جسم بہت نڈھال تھا، پھر بھی تِرا خیال تھا 

درد کہیں رکا رہا،۔۔۔ یاد کہیں دبی رہی

شکوے ہوئے گلے ہوئے، بے جا شکایتیں ہوئیں 

جنگ و جدل ہوئے ہزار، اس سے مگر بنی رہی

لکھتے رہے حدیثِ دل، کرتے رہے بیان درد 

پھر بھی میانِ جسم و جاں ویسی ہی بے کلی رہی

افتخار حیدر