جو آگ کا دریا مرے رستے میں کھڑا ہے

جو آگ کا دریا مِرے رستے میں کھڑا ہے

وہ میرے تخیل کی حدوں سے بھی بڑا ہے

سویا ہے جو سر وقت کی دہلیز پہ رکھ کر

وہ نیند کے طوفاں سے بہت دیر لڑا ہے

وہ جو مِری نس نس میں دکھن گھول رہا ہے

وہ ہجر کا خنجر مِرے سینے میں گڑا ہے

قدموں پہ جھکاتا تھا زمانے کو جو اک شخص

اب خاک بسر وقت کے قدموں میں پڑا ہے

آنکھوں میں نہیں دل میں اتارو سبھی آنسو

سن لو، کہ یہاں ضبط کا معیار کڑا ہے

عبدالرحمان واصف