دیکھتا ہی رہا پیالہ مجھے​

رات درکار تھا سنبھالا مجھے​

دیکھتا ہی رہا پیالہ مجھے​

جانے کس شام کا ستارہ ہوں​

جانے کس آنکھ نے اجالا مجھے​

میرے دل سے اتار دے نہ کہیں​

ایک دن یہ تِرا حوالہ مجھے​

کس طرح میں زمیں کا رِزق ہوا​

کس طرح اس زمیں نے پالا مجھے​

اور کتنی ہے زندگی میری​

اور کرنا ہے کیا ازالہ مجھے​

اس سے پہلے نظر نہیں آیا ​

اس طرح چاند کا یہ ہالہ مجھے​

آدمی کس کمال کا ہو گا​

جس نے تصویر سے نکالا مجھے​

میں تجھے آنکھ بھر کے دیکھ سکوں​

اتنا کافی ہے بس اجالا مجھے​

اس نے منظر بدل دیا یکسر​

چاہیے تھا ذرا سنبھالا مجھے​

اور کچھ یوں ہوا کہ بچوں نے​

چھینا جھپٹی میں توڑ ڈالا مجھے​

یاد ہیں آج بھی رؔسا وہ ہاتھ​

اور روٹی کا وہ نوالہ مجھے​

​

رسا چغتائی​