ذرا سی بات پہ ناراضگی اگر ہے یہی

ذرا سی بات پہ ناراضگی اگر ہے یہی

تو پھر نِبھے گی کہاں دوستی اگر ہے یہی​

تمہیں دعا بھی ہم آسودگی کی کیسے دیں

جو ہم نے دیکھی ہے آسودگی اگر ہے یہی​

ہمیں بکھرنا تو ہے کل نہیں تو آج سہی

ہمارا کیا ہے تمہاری خوشی اگر ہے یہی​

ابھی نہ جانے ہمیں کتنے دوست کھونے پڑیں

ہماری باتوں میں بے ساختگی اگر ہے یہی​

میں دل میں رکھتا نہیں منہ پہ صاف کہتا ہوں

کمی یہ مجھ میں ہے بیشک کمی اگر ہے یہی​

جو راہ بھٹکوں تو اس کی گلی میں آ نکلوں

خوشا نصیب مِری گمرہی اگر ہے یہی​

مثال دینی تو اپنی ہی ذات کی دینی

تو پھر غرور ہے کیا عاجزی اگر ہے یہی

مرتضیٰ برلاس​