اس کا سہرا بھی ترے عشق کے سر جاتا ہے

 اس کا سہرا بھی تِرے عشق کے سر جاتا ہے

مجھ کو ہر شخص دعا دے کے گزر جاتا ہے

چاند بھی ساتھ نبھانے میں ہے سائے کی طرح

یہ بھی ہر شخص کو خود چھوڑنے گھر جاتا ہے

کر کے آمادہ کوئی شخص سفر پر مجھ کو

اپنا رستہ مِری دہلیز پہ دھر جاتا ہے

صبح ہوتے ہی اچک لیتے ہیں الفاظ مجھے

میرا ہر دن کسی مصرع میں گزر جاتا ہے

یہ ستاروں کا تعاقب تو بہانہ ہے فقط

دیکھنا یہ ہے مجھے، چاند کدھر جاتا ہے

ایک سی ہو گی در و بام کی صورت ورنہ

خود سے یوں کون کسی اور کے گھر جاتا ہے

جب بھی چھونے کے لیے ہاتھ بڑھاتا ہوں کبیر

وہ مِرے سامنے رنگوں میں بکھر جاتا ہے

میں بھٹکنے سے فقط اس لیے ڈرتا ہوں کبیر

میں جدھر جاتا ہوں ہر شخص ادھر جاتا ہے

کبیر اطہر