تو تو کہتا تھا تجھے اس نے بھلایا ہوا ہے

 تُو تو کہتا تھا تجھے اس نے بھلایا ہوا ہے

آج وہ تیرے جنازے میں تو آیا ہوا ہے

اجرتیں مل گئیں صدیوں کے سفر کی مجھ کو

جب کہا اس نے کہ کیا حال بنایا ہوا ہے

ہاتھ میں کوئی تو درویش کے گُر ہے جس نے

گردشِ دوراں کو قدموں میں بٹھایا ہوا ہے

میں تجھے اٹھ کے سلامی بھی نہیں دے سکتا

وقت ظالم مجھے کس موڑ پہ لایا ہوا ہے

ایک پودا کہ جو سائے میں بہت پھلتا ہے

میں نے سورج کی شعاعوں سے بچایا ہوا ہے

یہ تِرے خط ہیں پڑے، یہ تِری تصویریں ہیں

زندگی کیا ہے؟ فقط، کام چلایا ہوا ہے

حوصلے پست نہ مقتل میں بھی ہونے دینا

شہر کا شہر تجھے دیکھنے آیا ہوا ہے

تُو نے آنا ہے تو پھر دیر نہ کر آنے میں

میں نے اس موت کو مشکل سے منایا ہوا ہے

میں نے کل غور سے دیکھا تھا تِری غزلوں کو

کاغذوں نے یہ عبث بوجھ اٹھایا ہوا ہے

قبر سے اٹھنا پڑے گا تجھے اب تو غزنی

دیکھ اٹھ کر کہ کوئی دیکھنے آیا ہوا ہے

محمود غزنی