مان لے
کسی ہاتھ پر کسی لوح پر
جو لکھا نہیں
وہی ایک حرفِ گماں ہیں ہم
خطِ گمشدہ میں لکھی گئی
کوئی اجنبی سی زباں ہیں ہم
کسی اور خطۂ درد پر
جو گزر سو گزر گیا
کوئی بے نشاں سا نشاں ہیں ہم
کبھی اپنے ہونے کے واہمے سے نکل کے دنیا کو دیکھیے
تو نہ کھل سکے کہ کہاں ہیں ہم
مری جاں! ہماری یہ داستاں
اسی آسماں کی چھت تلے
انہی کہکشاؤں کے درمیاں
کئی لاکھ بار کہی گئی
کئی لاکھ بار سنی گئی
یہ حدیثِ نغمۂ بے صدا
کبھی سرخ پھولوں کی تیز خوشبو میں رک گئی
کہیں آنسوؤں میں رواں ہوئی
یہ وہ شمعِ شامِ وصال ہے
جو تمام رات جلی کبھی
کبھی ایک پل میں دھواں ہوئی
کبھی روشنی کا یقیں بنی
کبھی تیرگی کا گمان ہوئی
تو جو ہو گیا اسے مان لے
امجد اسلام امجد
No comments:
Post a Comment