یہ نہ کہنا کبھی ہر درد سے آزاد ہیں ہم

 یہ نا کہنا کبھی ہر درد سے آزاد ہیں ہم

عشق ہم نے بھی کیا عشق کے فرہاد ہیں ہم

اپنی خواہش کا ہمیں قتل کیا کرتے ہیں

آدمی کہنے کو ہیں اصل میں جلاد ہیں ہم

ہم نے وہ لکھی ہے تحریرِ اماں کاغذ پر 

منہ زبانی کئی آنکھوں کو ابھی یاد ہیں ہم

بانٹتے پھرتے ہیں ہم امن و اماں کے دانے 

دیکھنے والے سمجھتے ہیں کی صیاد ہیں ہم

جس کو تاریخ فراموش نہیں کر سکتی

وہ تیرے شہر کی ٹوٹی ہوئی بنیاد ہیں ہم

روتے روتے ہوئے ہنسنے کی ہمیں عادت ہے

مکتبِ عشق کے پہنچے ہوئے استاد ہیں ہم

ہم کو پڑھ کر کے بہت روئیں گے پڑھنے والے 

نسلِ آدم کے لیے وہ نئی روداد ہیں ہم

زندگی چاک پہ رکھ رکھ کے نچاتی ہے ہمیں 

ایسی مٹی کی بنائی ہوئی ایجاد ہیں ہم

جل گئے تپتی زمینوں پہ ہمارے خیمے

ہائے افسوس ابھی جانبِ بیداد ہیں ہم

ہم نے چھوڑا ہے ترقی کے لیے گھر اپنا 

اپنے ماں باپ کی بگڑی ہوئی اولاد ہیں ہم

کون روکے گا خلاؤں کے سفر سے ہم کو

اب تو صیاد تیری قید سے آزاد ہیں ہم

شہر میں اس لیے ہے امن و اماں کا موسم

ایک مدت سے اسی شہر میں آباد ہیں ہم

کب تیرے غم سے پریشان ہوئے ہم دنیا 

صرف دل ہی نہیں تو دیکھ کی دلشاد ہیں ہم

دل سکندر پوری