شہرِ آشوب
صبحدم جو دیکھا تھا
کیا ہرا بھرا گھر تھا
ڈانٹتی ہوئی بیوی
بھاگتے ہوئے بچے
رسیوں کی بانہوں میں
جھولتے ہوئے کپڑے
بولتے ہوئے برتن
جاگتے ہوئے چولہے
مرغیوں کے ڈربے تھے
کابکیں تھیں، پنجرہ تھا
دور ایک کونے میں
سائیکل کا پہیہ تھا
بیس گز کے آنگن میں
سب ہی کچھ تو رکھا تھا
ایک پل میں یہ منظر
کیا بدل سا جاتا ہے
کچھ نظر نہیں آتا
بولتا ہے سناٹا
ایمبولینس ایدھی کی
بین کرتی آتی ہے
سب جلی کٹی لاشیں
ساتھ لے کے جاتی ہے
بچوں کی، بوڑھوں کی
عورتوں اور جوانوں کی
مسجدوں سے ہوتی ہیں
بارشیں اذانوں کی
لا الہ الا الله
لا الہ الا الله
زہرا نگاہ
No comments:
Post a Comment