ٹھہر گئے تھے سرِ رہگزار بس یونہی

 ٹھہر گئے تھے سرِ رہگزار بس یونہی

تمہارا کرتے رہے انتظار بس یونہی

یہ جان کر بھی کہ تُو اپنی دسترس میں نہیں

وفا کا کھینچ دیا اک حصار بس یونہی

وہ میرا تھا ہی نہیں میں کسی سے کیوں کہتی

یہ راز ہو گیا ہے آشکار بس یونہی

تم اپنے عہد میں نا معتبر سدا کے تھے

تمہارا کر لیا پھر اعتبار بس یونہی

ہزار بار تمہیں جیتنے کی کوشش میں

تمہارے سامنے مانی ہے ہار بس یونہی

شکار ہونے کے ڈر سے لیے دئیے سے رہے

یہ تیر ہو گیا ہے آر پار بس یونہی

ہمارے قریۂ جاں پر حکومتیں کر لو

تمہیں یہ دے رہے ہیں اختیار بس یونہی

مِری زمیں پہ قیامت تو نئی بات نہ تھی

یہ آنکھ ہو گئی ہے اشکبار بس یونہی

پھر ایک بار لہو میں ہیں حدتیں جاگیں

اتر نہ جائے کہیں یہ بخار بس یونہی

بشریٰ خلیل