بلائیں لوٹتی ہیں جب کہیں سے

بلائیں لَوٹتی ہیں جب کہیں سے

تو بسم اللہ ہوتی ہے ہمیں سے

ابھی سے چاک ہوتے جا رہے ہیں

کہیں سے جیب اور دامن کہیں سے

جنوں کا ہے یہی عالم تو کب تک

گریباں کا تعلق آستیں سے

خوشی میں بھی وہ اک کیفیتِ غم

نہیں جاتی دلِ اندوہ گیں سے

گرفتارِ بلا ہو کر یہ دیکھا

بدل جاتی ہے اک دنیا یہیں سے

غرورِ آسماں یہ دیکھنا ہے

کہاں تک پست ہوتا ہے زمیں سے

ہمیں حیرت دکھانا ہے کسی کو

مٹا کر داغِ ناکامی جبیں سے

حیرت شملوی