تری شان جل جلالہ

(تِری شان جلّ جلالہ (حمد باری تعالیٰ

ہے نظر نظر تِری روشنی، ہے چمن چمن تِرا رنگ و بُو

تُو ہی دھڑکنوں کا امین ہے، تُو ہی زندگی کی ہے آبرُو

تِری شان جلّ جلالہ

یہ مَہ و نجوم، یہ کہکشاں، یہ کلی، یہ غُنچہ، یہ گُلستاں

ہیں تِری نگاہ سے ضو فشاں، جہاں دیکھئے وہاں تُو ہی تُو

تِری شان جلّ جلالہ

تُو جو چاہے مالکِ دو جہاں، رگِ سنگ سے ہو لہو رواں

تُو مکاں سے تا سرِِ لا مکاں، تِرا نُور ہی ہے چہار سُو

تِری شان جلّ جلالہ

یہ غریب قیصرِِ بے نوا، رہے کب تلک یونہی غمزدہ

ہو اسے بھی تھوڑی خوشی عطا، ہے حیات اس کی لہُو لہُو

تِری شان جلّ جلالہ

قیصر صدیقی