اک پیکر افکار ہوں اور کچھ بھی نہیں ہوں

 اک پیکرِ افکار ہوں اور کچھ بھی نہیں ہوں

میں صاحبِ کردار ہوں اور کچھ بھی نہیں ہوں

عورت ہوں مگر مرد سے کمتر بھی نہ جانو

میں ناؤ کی پتوار ہوں اور کچھ بھی نہیں ہوں

اجداد کی شفقت و رفاقت میں پلی ہوں

شیریں دم گفتار ہوں اور کچھ بھی نہیں ہوں

پہچانو مِرے جذبوں کی سچائی سے مجھ کو

سر تا پا وفادار ہوں اور کچھ بھی نہیں ہوں

یہ روشنی مجھ کو میرے مولا کی عطا ہے

اک ذرۂ انوار ہوں اور کچھ بھی نہیں ہوں

خود دیں گے گواہی مِرے اشعار یہ اک دن

میں ان کی علمدار ہوں اور کچھ بھی نہیں ہوں

کرتی ہوں تکبر کے خداؤں سے میں نفرت

راحت کی طلبگار ہوں اور کچھ بھی نہیں ہوں

راحت زاہد