طلوعِ فجر سے پہلے کے منظر دیکھتے رہنا
مِرا معمول ہے راتوں کو اکثر جاگتے رہنا
کسی کی یاد کے سارے حوالے ذہن میں رکھ کر
خلاؤں میں کوئی گم گشتہ جنت ڈھونڈتے رہنا
کبھی یخ بستہ راتوں میں کسی کا منتظر رہنا
تصور میں کبھی ماضی سجا کر سوچتے رہنا
کبھی بے چارگئ عشق کے ہاتھوں سرِ محفل
شکستہ آرزوؤں سے مسلسل کھیلتے رہنا
گلوں کی تازگی سے اکتسابِ رنگ و بو کرنا
جبینِ شوق پر روشن ستارے ٹانکتے رہنا
یوسف خالد
No comments:
Post a Comment