ملحوظ رہے اتنا اے محوِ خود آرائی
شرمندہ نہ ہو جائے اعجازِ مسیحائی
بازی گہِ عالم میں لاکھوں کی شناسائی
کچھ میں بھی ہوں ہرجائی، کچھ تُو بھی ہے ہرجائی
اے دوست! تِرے قرباں، وہ غم مجھے بخشا ہے
غیروں سے نہ تھی ممکن جس غم کی پذیرائی
یا حسن سمجھ لے خود آنکھوں کے اشاروں کو
یا عشق کو مل جائے اب طاقتِ گویائی
گزرے ہیں کئی باراں کُہسار و بیاباں سے
ہم نے تجھے دیکھا ہے اے لالۂ صحرائی
یہ سب دلِ زندہ کے دم ہی سے عبارت ہے
جذبات کی پیری ہے، جذبات کی برنائی
ہر گام پہ دنیا تھی داماں بہ طرف خالد
کچھ اپنی طبیعت ہی لیکن نہ ادھر آئی
خالد علیگ
No comments:
Post a Comment