بڑی پاگل سی لڑکی تھی بہت ہی شوخ چنچل سی

 وہ اک چنچل سی لڑکی تھی

وہ اک چنچل سی لڑکی تھی

یہیں اک گھر میں رہتی تھی

میں اکثر شام کو اس رہگزر سے جب نکلتا تھا

وہ اس کے قہقہے اور

بے تحاشہ بولتے جانا

کبھی پُر شور جھرنوں سا

کبھی اک گیت کے جیسا

مدھر لہروں پہ گونجے

جلترنگ سنگیت کے جیسا

مِرے کانوں میں اس کا دلنشین لہجہ کھنکتا تھا

وہ میرے ذہنِ خوابیدہ کو اکثر گدگداتا تھا

میں اس کو سوچتا اور بےارادہ مسکراتا تھا

بڑی پاگل سی لڑکی تھی

بہت ہی شوخ چنچل سی

نہ جانے کیوں مجھے محسوس ہوتا ہے

ہزاروں لاڈ سے پالی ہوئی وہ موہنی مورت

ادائیں اس کی جتنی شوخ، اتنی کامنی صورت

مگر یہ بھی تو ممکن ہے

بہت ہی نک چڑھی اکھڑ سی ہو شاید

سلونی روپ رنگت کی

کبھی تو ایک دم الجھی

کبھی مغرور ضدی سی

کبھی ازاد پنچھی سی

کبھی سلجھی ہوئی

حساس بادل سی

اسے سننے کی خاطر

میں وہاں آہستہ چلتا تھا

بہت محظوظ ہوتا تھا

مگر ہفتہ ہوا اب بھی

گلی میں روز آتا ہوں

ابھی بھی راستہ چلتے ہوئے

میں رک تو جاتا ہوں

گلی ویران رہتی ہے

فضا خاموش رہتی ہے

اداسی رقص کرتی ہے

میں اکثر سوچتا بھی ہوں

اداسی نے اسے کیوں گھیر رکھا ہے

وہ اس کے شوخ جملے خوشنما الفاظ

سارے اجنبی کیون ہو گئے لب سے

بہت سوچا بہت سوچا

پھر اک دن پوچھ ہی ڈالا

ایک پاگل سی لڑکی تھی

یہین اک گھر میں رہتی تھی

بہت ہی شور کرتی تھی

بڑی الھڑ سی لڑکی تھی

بتاؤ اب کہاں ہے وہ

کسی نے مجھ کو دکھلا یا

کسی نے ہنس کے بتلایا

وہ دیکھو گھر وہ اس کا ہے

اسے پردیس جانا ہے

پرایا گھر بسانا ہے

بِدائی کا سمے اس موہنی کی پاس آیا ہے

تو اب سب لاڈ نخرے ضد ہنسی اور منچلی باتیں

جو سکھیاں تھیں پرائی ہیں

وہ بیٹی تھی بہو بنا ہے اس کو اب

پرانی عادتیں اپنی اسے سب بھول جانا ہے

یہیں پر چھوڑ جانا ہے

سو اب خاموش رہتی ہے

فقط اب مسکراتی ہے

جو ایک چنچل سی لڑکی تھی

بہت خاموش رہتی ہے

بہت خاموش رہتی ہے

اسریٰ رضوی