میں دریا ہوں محبت کا بہا کر لے ہی جاؤں گا

 میں دریا ہوں محبت کا بہا کر لے ہی جاؤں گا

مِری منزل الگ ہو گی میں رستہ خود بناؤں گا

سمجھتے ہو تمھارے بِن نہیں گزرے گی اب اپنی

تمہارے بِن میں دنیا میں تمہیں جی کر دکھاؤں گا

جہاں پر تم نہیں ہوتے وہاں کیا دن نہیں ہوتا

غلط فہمی تمہاری ہے کہ کچھ بھی کر نہ پاؤں گا

چلا جائے جِسے جانا ہے بےشک چھوڑ کر مجھ کو

نہ اب میں ہاتھ جوڑوں گا نہ پھر اس کو مناؤں گا

تجھے بھی اک نہ اک دن تو غموں سے ہار جانا ہے

کہاں تک تیرے ناز اے زندگی میں اب اٹھاؤں گا

میں اپنے غم چھپا لوں گا تمہاری بزم میں آ کر

کسی سے کچھ کہوں گا اور نہ حالِ دل سناؤں گا

اکیلے ہی میں سہہ لوں گا جو دکھ بھی ہے جدائی کا

مگر تم سوچتے ہو گے تمہیں آ کر بتاؤں گا

تمہارے شہر میں آ کر اِنہی گلیوں سے گزروں گا

تمہیں پھر سے خبر ہو گی تمہیں اِیسے ستاؤں گا

نظر انداز کرنے کا سلیقہ جانتا ہوں میں

تُو صدیوں یاد رکھے گا تجھے ایسے بھلاؤں گا

عجیب ساجد