بہت مجبور تھے مجبور ہیں مجبور رہتے ہیں
کہ ہم مزدور تھے مزدور ہیں مزدور رہتے ہیں
کسے سُولی چڑھانا ہو،۔ ہمارا نام آتا ہے
کہ ہم منصور تھے منصور ہیں منصور رہتے ہیں
پرندوں کی ہجرت پر، ہماری یاد آتی ہے
کہ ہم مہجور تھے مہجور ہیں مہجور رہتے ہیں
فقط منشور بنتے ہیں ہمیں محکوم رکھنے کے
یہی دستور تھے دستور ہیں دستور رہتے ہیں
کہیں لوح و قلم میں بھی یہی لکھا گیا شاید
کہ ہم مقہور تھے مقہور ہیں مقہور رہتے ہیں
ہمیں گمنام رکھنے کی بہت کوشش رہی آغا
کہ ہم مشہور تھے مشہور ہیں مشہور رہتے ہیں
آغا نیاز مگسی
No comments:
Post a Comment