جہاں میں جس پہ کرم اعتبار کرتے ہیں

 جہاں میں جس پہ کرم اعتبار کرتے ہیں

وہ تیر دل کے مِرے آر پار کرتے ہیں

یہ جان جس پہ بھی ہنس کے نثار کرتے ہیں

وہ دشمنوں میں ہمیں ہی شمار کرتے ہیں

ستم زمانے کے سہتے ہیں آہ بھرتے ہوئے

ہم آنکھ ہی کو سدا اشک بار کرتے ہیں

نہیں ہے تیغ کی حاجت انہیں کبھی یارو

حسین لوگ نظر سے شکار کرتے ہیں

جو بات دل کی ہو دل میں دبا کے رکھتے ہیں

نہ ہم کسی کو کبھی رازدار کرتے ہیں

عدو سے خوف نہیں مجھ کو دوستوں سے ہے

ہمیشہ پیٹھ پہ اپنے ہی وار کرتے ہیں

یہ جانتے ہیں کہ اب وہ نہ آئیں گے یارو

"نہ جانے کس لیے ہم انتظار کرتے ہیں "

چھپا کے رکھتے ہیں ان سے بھی حالِ دل کا کرم

انہیں کہا ہی نہیں ان سے پیار کرتے ہیں

کرم حسین بزدار