سب تری بزم سے سوغات اٹھا کر لائے

 سب تِری بزم سے سوغات اٹھا کر لائے

ہم اٹھے اور تجھے ساتھ اٹھا کر لائے

خیمۂ صبح میں بیٹھے تِری زلفوں کے اسیر

دن کی موجودگی میں رات اٹھا کر لے آئے

اب مجھے یاد نہیں تیری گلی کی جانب

خود چلا آیا کہ حالات اٹھا کر لے آئے

بند ان آنکھوں میں جب سے درِ میخانہ ہوا

لوگ ذہنوں میں خرابات اٹھا کر لے آئے

میں نے پوچھا تھا کہو، ارض و سما کیسے ہیں

کیا ہوا؟ آپ شکایات اٹھا کر لے آئے

نفع نقصان سے واقف ہی نہیں اہلِ جنوں

اور تم لوگ حسابات اٹھا کر لے آئے

پہلے افراد کو طبقات میں تقسیم کیا

اس پہ جمہوری مساوات اٹھا کر لے آئے

ختم کرنے جو آئے تھے رواجوں کا نظام

اپنے ہمراہ رسومات اٹھا کر لے آئے

کیسی بے حرمتی پیڑوں کی پرندوں کی ہوئی

تم جو شہروں میں مضافات اٹھا کر لے آئے

صرف آواز کی خوشبو ہی نہیں لائے تھے ہم

خامشی کو بھی لگے ہاتھ اٹھا کر لے آئے

تُو نے جو بھی کہا عشاق تِرے مان گئے

عقل والے تو سوالات اٹھا کر لے آئے

کوئی تو بات ہے ایسی کہ تِرے پہلو سے

خود کو بھی ہم بسا اوقات اٹھا کر لے آئے

گفتگو معجزۂ فن پہ تھی اور اہلِ ہنر

اپنی بے فیض کرامات اٹھا کر لے آئے

کل نئی نسل کی تہذیب نمائی میں سلیم

ہم بزرگوں کی روایات اٹھا کر لے آئے

سلیم کوثر