دل کے حریم شوق میں ایک ہے نام اور بس

 عارفانہ کلام حمد نعت منقبت

دل کے حریمِ شوق میں ایک ہے نام اور بس

اُس پہ درود اور بس، اُس پہ سلام اور بس

بہرِ نیازِ نعتِﷺ نَو، بہرِ جوازِ حرفِ دل

عرضِ خیالِ خام کو مژدۂ تام اور بس

نُدرت حرف بے نشاں، جودتِ جذب بے نمو

پیشِ حضورﷺ لایا ہُوں خام کلام اور بس

اتنی سی ہے طلب دروں، اتنا سا ہے جنوں بروں

کہہ دیں وہ مجھ کو روزِ حشر، میرا غُلام اور بس

چمکے شعاعِ صبحِ دید روزنِ خوابِ شوق سے

نکھرے خیالِ شامِ وصل بر سرِ بام اور بس

شہرِ کرم ہو رو برو، مہکی ہو آس چار سُو

ایسی ہو صبح اور بس، ایسی ہو شام اور بس

تابِ رُخِ حیات ہو عکسِ خیالِ جانِ جاں

اوجِ نصیبِ شوق ہو مدحِ مدام اور بس

آنکھوں میں رتجگے کِھلیں ان کی نویدِ دید کے

دل پہ رواں دواں رہے موج خرام اور بس

گرچہ رہوں فراق زاد، گرچہ طلب دراز ہو

پیشِ نظر ہو مطلعِ ماہِ تمام اور بس

نعت جمالِ زندگی، نعت کمالِ بندگی

خیرِ الانام اور بس خیرِ الانام اور بس

مقصود علی شاہ