جمال عشق نبی سے حیات روشن ہے

 عارفانہ کلام حمد نعت منقبت

جمالِ عشقِ نبیؐ سے حیات روشن ہے

تجلیوں سے مِری کائنات روشن ہے

مہک رہے ہیں جو یہ پیرہن گُلابوں کے

صبا کے ہونٹوں پہ تیری ہی بات روشن ہے

وہ جس کو بخشی ہے معراج میرے مولیٰ نے

قسم سے کلمۂ حق میں وہ ذات روشن ہے

وہاں پہ شمس و قمر آتے ہیں دُلہن بن کر

تجلیوں کی جہاں پر برات روشن ہے

جو تیرے نقش قدم پر نثار رہتے ہیں

ہر ایک پہلو سے ان کی حیات روشن ہے

مہک رہی ہے جو خُوشبو سے رات کی رانی

جمالِ گیسُوئے جاناں سے رات روشن ہے

فنا کے گهور اندھیرے بھی چُھو نہیں سکتے

بقا کی گود میں جن کی حیات روشن ہے

تصورات میں تشنہ لبی ہے اصغرؑ کی

مِری ان آنکھوں میں نہر فرات روشن ہے

نبیﷺ کے نقشِ قدم کا یہ فیض ہے افضل

وہ جس کے نُور سے یہ کائنات روشن ہے

افضل الہ آبادی