جبیں میری ہو سنگ در تمہارا یا رسول اللہ

 عارفانہ کلام حمد نعت منقبت

جبیں میری ہو سنگِ در تمہارا یا رسول اللہﷺ

یہی ہے ایک جینے کا سہارا یا رسول اللہﷺ

دکھا دو اپنا چہرہ پیارا پیارا یا رسول اللّٰہﷺ

خدا را جیتے جی کر لوں نظارہ یا رسول اللہﷺ

نہیں فُرقت میں اب جینے کا چارا یا رسول اللہﷺ

بُلا لو اپنے قدموں میں خدا را یا رسول اللہﷺ

تمہی ہو بے سہاروں کا سہارا یا رسول اللہﷺ

تمہی کو ہر دُکھی دل نے پُکارا یا رسول اللہﷺ

نِدامت ہے خطاؤں پر مگر نازاں ہوں قسمت پر

مِرے ہاتھوں میں ہے دامن تمہارا یا رسول اللہﷺ

زمانہ چُھوٹ جائے، رُوٹھ جائے، کچھ نہیں پرواہ

نہ چُھوٹے ہاتھ سے دامن سے تمہارا یارسول اللہ ﷺ

نہ دنیا کی مجھے خواہش، نہ عُقبیٰ کی تمنّا ہے

مجھے اپنا بنا لیجیۓ خدا را یا رسول اللہﷺ

نہیں ایسا کوئی جس پر نہ ہو احسان کی بارش

تِرے ٹُکڑوں پہ ہے سب کا گُزارا یا رسول اللہﷺ

میں قُرباں اس ادائے دستگیری پر میرے آقاﷺ

مدد کو آ گئے جب بھی پُکارا یا رسول اللہﷺ

بروزِ حشر میری اس یقیں کی لاج رکھ لینا

تمہارا ہوں تمہارا ہوں تمہارا یا رسول اللہﷺ

اگر کوئی تمنّا ہے، تو بس اتنی تمنّا ہے

میں کہلاؤں دو عالم میں تمہارا یا رسول اللہﷺ

غلامِ احمدِ مختارﷺ یوں پہچانے جائیں گے

کہ ہو گا حشر میں بھی ان کا نعرہ یا رسول اللہﷺ

تِرا در ہو،۔ مِرا سر ہو،۔ سکونِ دل میسّر ہو

پِھرے کب تک یہ انجم مارا مارا یا رسول اللہﷺ

قمر انجم