عشق حضور زینت سامان نعت ہے

 عارفانہ کلام حمد نعت منقبت

عشقِ حضورؐ، زینتِ سامانِ نعت ہے

روشن چراغِ بخت بہ فیضانِ نعت ہے

ہر عالمِ نمو میں ہے خُوشبو حضورؐ کی

"ہر شعبۂ حیات میں امکانِ نعت ہے"

سب عاشقانِ صورتِ محمودﷺ کے لیے

سیرت شۂ عربﷺ کی دبستانِ نعت ہے

گلُہائے باغِ مدح و ثنا ہوں جو رو برو

تو مثلِ عندلیب سخن دانِ نعت ہے

طیبہ سے لامکان تلک جو ہے فاصلہ

ہر گام مصطفےٰﷺ کا گلستانِ نعت ہے

سر پر ہے لختِ ابرِ عنایاتِ وحدہ

اپنے مزاجِ دل کو جو میلانِ نعت ہے

سجدہ ہے کربلا کا بھی حُسنِ ثنا گری

اقصیٰ میں وہ نماز بھی جانانِ نعت ہے

باغِ شبِ فلک ہے ضیا بار اس لیے

تاروں کا ہر ہجوم خیابانِ نعت ہے

والشمس کا ہو نُور کہ واللیل کی ادا

صلِ علیٰ کا حسن ہی شایانِ نعت ہے

ہر سورت ایک پھول ہے ہر اک حدیث شاخ

یہ کنزِ رنگ و بُو ہے جو عرفانِ نعت ہے

آوازِ کُن فکاں ہے خصائص کا زمزمہ

گویا ظہورِ ہست بھی اعلانِ نعت ہے

وہ سلسبیل و کوثر و تسنیمِ خُلد سب

مل جائیں تو سمجھنا کہ احسانِ نعت ہے

جاوید عادل سوہاوی