شکر خدا کہ مجھ پہ یہ احسان نعت ہے

 عارفانہ کلام حمد نعت منقبت

شکرِ خُدا کہ مجھ پہ یہ احسانِ نعت ہے

سر پر میرے بھی سایۂ دامانِ نعت ہے

حرف و سخن پہ دسترس اپنی جگہ مگر

دراصل وصفِ حبِ نبیؐ جانِ نعت ہے

فکر و شعور و حرف و ہُنر با وضو رہیں

تخلیق کے لیے یہی سامانِ نعت ہے

اشعار میں ہے سورۂ یٰس کا جمال

حرفِ درودﷺ شمعِ شبستانِ نعت ہے

ہے آپﷺ کی حیات ہمہ گیر اس قدر

"ہر شعبۂ حیات میں امکانِ نعت ہے"

ہر اک ادائے نُور پہ ہیں آیتیں گواہ

سیرت میرے حضورؐ کی قرآنِ نعت ہے

حُسنِ عمل ہے مدحتِ مولاؐ کا اک چمن

حُسنِ کلام زیبِ سخندانِ نعت ہے

آنکھیں کہ انؐ کے ذکر میں نمناک ہیں سدا

اور دل ہزار جان سے قربانِ نعت ہے

ہر عندلیبِ قُدس کے لب مُشکبوئے نعت

باغِ اِرم ہے یا کوئی دالانِ نعت ہے

آنکھوں کے طاقچوں میں رکھے آرزوئے دید

بے چین کب سے حلقۂ مستانِ نعت ہے

جل تھل ہوئی ہے دل کی زمیں یادِ شاہؐ میں

اشکوں کی یہ گھٹا ہے یا بارانِ نعت ہے

الفاتحہ سے سُورۂ والناس تک گواہ

قرآن حرف حرف ہی بُرھانِ نعت ہے

سرکارﷺ کوئی اچھا نہیں نامۂ عمل

محشر میں دستِ نُور میں دیوانِ نعت ہے

نورین طلعت عروبہ